კიევს ჩემთვის ერთი მნიშვნელოვანი თავისებურება აქვს. არცერთ ქალაქში საქართველოს ფარგლებს გარეთ არ მყავს ამდებნი ახლობელი, ნაცნობი, მეგობარი, ამიტომ მუდმივად ხელიდან ხელში გადავდიოდი. ლავრასთან კიდევ ერთ მეგობარს შევხვდი და სადილად წავედით. მე დაჟინებით ვითხოვდი უკრაინულ რესტორანს. როგორც გაირკვა საბურთალოზე უკრაინული რესტორანების კონცენტრაცია აღემატება უკრაინაში ნებისმიერ ადგილზე ეროვნული რესტორანების კონცენტრაციას.
ვიარეთ, ვიარეთ, გზად ასეთი ნომრიანი მანქანა ვნახეთ. შემდეგ კი ცენტრში ვნახეთ რესტორანი სპოტიკაჩი, სადაც ფასებიც, სამზარეულოც და მომსახურებაც ოპტიმალურია. მეორე ფოტოზე ქართული დროშით ქართული რესტორანია აღნიშნული. უკრაინაში საერთოდ ქართული სამზარეულოს პოვნა უფრო ადვილია ვიდრე უკრაინულის. რატომღაც…
რა მომწონს უკრაინელებში – ეს იუმორის გრძნობაა. ესკიმო ბორშჩი გაგისინჯავთ? ა ბატონო ესეც არის 🙂 თუმცა ესკიმოს ხასიათზე ნამდვილი არ ვიყავი, მაგრამ ტრადიციული, მამა-პაპური ბორჩში გეახელით, და უგემრიელესი იყო. ქართულ ანალოგს ჯობდა. მეორეზე სისხლიანი ძეხვი (სვანურად ზისხორა) გეახელით, უკრაინაში ამას წიწიბურის ფაფით აკეთებენ. ესეც ძალიან გემრიელია. ორ კაცს ასეთი სადილი, (პირველი, მეორე, სასმელი, პური) დაახლობევით 37 ლარი დაგვიჯდა. თან ეს კარგი რესტორანი იყო, სადაც გარდერობში დაგვაკიდებინეს ქურთუკები, და იქვე სპოტიკაჩი ნალივკა გადაგვაკვრევინეს. სერვისის დონეც ქართულს ბევრად ჯობია. სადილის შემდეგ მარტო განვაგრძე სეირნობა. საღამოს კიდევ 2 ამხანაგი უნდა მენახა და დრო მქონდა გასაყვანი.
ტრადიციულ მარშრუტზე, სოფიოს მოედანზე გავიბოდიალე, მაიდანზე ჩავედი და მეტროთი რკინიგზის სადგურამდე მივედი. უკვე საღამო იყო და ორ მანიაკ ფოტოგრაფ მეგობარსაც შევხვდი, ვინც მანიაკ ფოტოგრაფ შვილს ზრდიან. მათ წამიყვანეს სადღან გარეუბანში, სადაც ერთ-ერთი მაღალსართულიანი კორპუსის სახურავზე გადმოსახედია მოწყობილი. ავედით და მანიაკები ფოტოსესიას შეუდგნენ.
სიმართლე ვთქვათ და კიევი ძალიან ვაკე ქალაქია, ამიტომ გადასახედ-გადმოსახედები არ უვარგა. უბრალოდ ყოველთვის მიტყდებოდა მეთქვა ჩემი უკრაინელი მეგობრებისთვის, რომ გადმოსახედებით თბილისელს ვერ გააკვირვებ თუ კატმანდუში არა ხარ. სამაგიეროდ ამ ფოტოსესიის შემდეგ მე შევაბი ანდრეას დაღმართზე სასეირნოდ, სადაც ყველამ დიდი სიამოვნება მივიღეთ.
